Diaspor Gənclərinin V Yay Düşərgəsinin iştirakçısı Kambocada Azərbaycan haqqında təqdimatla çıxış edib

Diaspor Gənclərinin V Yay Düşərgəsinin Kambocadan olan iştirakçısı Fazy Heath öz ölkəsinə geri döndükdən sonra Azərbaycan haqqında təqdimat hazırlayıb.

ILK.AZ Azərtac-a istinadən xəbər verir ki, bu barədə Diasporla İş üzrə Dövlət Komitəsindən bildirilib.

Vurğulanıb ki, təqdimatda ölkəmiz və düşərgə haqqında ətraflı məlumat verilib. Fazy Heath işğaldan azad olunmuş Laçın, Xankəndi, Şuşa, Xocalı və Əsgəran haqqında təəssüratlarını bölüşüb.

Tədbirdə Kambocanın müxtəlif universitetlərində təhsil alan 16 tələbə iştirak edib. Sonda Fazy Heath onlara Azərbaycandan apardığı suvenirləri hədiyyə edib.

Qeyd edək ki, avqustun 1-dən 7-dək davam edən və diaspor tarixinin möhtəşəm layihələrindən biri hesab olunan “Gənclər Yaşıl Dünya Naminə” Diaspor Gənclərinin V Yay Düşərgəsi bu il Laçın şəhərində baş tutub. Düşərgədə dünyanın 60 ölkəsindən 115 gənc iştirak edib. Onların sırasında həm dünyanın müxtəlif ölkələrində yaşayan azərbaycanlılar, həm də Azərbaycana dost münasibəti bəsləyən xalqların nümayəndələri yer alıb.

Mənbə: AZƏRTAC