İstanbuldakı Heydər Əliyev adına məktəbin şagirdləri ilə maarifləndirici görüş keçirilib

1 İyun - Uşaqların Beynəlxalq Müdafiəsi Günü və 28 May- Müstəqillik Günü münasibətilə İstanbulda fəaliyyət göstərən Heydər Əliyev adına məktəbdə maarifləndirici görüş keçirilib.

ILK.AZ Azərtac-a istinadən xəbər verir ki, tədbirdə məktəblilərlə görüşən İstanbul-Azərbaycan Dostluq Dərnəyinin sədri Xuraman Hülya Ağasoy onları Uşaqların Beynəlxalq Müdafiəsi Günü münasibətilə təbrik edib, Azərbaycanın müstəqillik tarixindən danışıb.

Bildirilib ki, 28 May yalnız Azərbaycan xalqının tarixində dönüş nöqtəsi deyil, eyni zamanda Türk tarixinin şanlı səhifəsidir.

Azərbaycanın öz müstəqilliyini 1991-ci ildə yenidən bərpa etdiyini bildirən Xuraman xanım bunun heç də asan olmadığını, təhsil aldıqları məktəblərin adını daşıdığı dahi şəxsiyyət Ümummilli Lider Heydər Əliyevin əvəzsiz xidmətləri ilə indiki güclü-qüdrətli Azərbaycanın təməlinin qoyulduğunu deyib. Vətən müharibəsi və Ordumuzun qazandığı şanlı Zəfəri xatırladan natiq Azərbaycan tarixi, o cümlədən bütün Türk dünyasını qürurlandıran bu tarixi hadisəni gələcək nəsillərə çatdırmağın onların ən böyük vəzifəsi olduğunu söyləyib.

Şagirdlər öz növbəsində Vətən, xalq və Ulu Öndər Heydər Əliyevə həsr olunan şeirlər səsləndiriblər.

Əlamətdar gün münasibətilə uşaqlara xatirə hədiyyələri təqdim edilib.

Mənbə: AZƏRTAC