Miqrasiya Xidmətinin rəsmisi: Məqsədli nikahlar qanunsuz miqrasiyanın hüdudlarının genişlənməsinə gətirib çıxarır

Məqsədli nikahlara qarşı ciddi mübarizə aparılır. Çünki belə nikahlar qanunsuz miqrasiyanın hüdudlarının genişlənməsinə gətirib çıxarır.

ILK.AZ Azərtac-a istinadən xəbər verir ki, bunu Dövlət Miqrasiya Xidmətinin Miqrasiya siyasəti və hüquqi təminat baş idarəsinin Hüquqi təminat idarəsinin rəisi Nizami Quliyev Milli Məclisin Ailə, qadın və uşaq məsələləri komitəsinin iclasında deyib.

N.Quliyev Ailə Məcəlləsinə dəyişikliklərlə bağlı qanun layihəsinə fikir bildirərkən qeyd edib ki, məqsədli nikahlar qanunvericiliyin müəyyənləşdirdiyi imtiyazlardan sui-istifadə edilməsi riski yaradır.

Onun sözlərinə görə, bu, həmçinin qanunsuz miqrasiyanın qarşısının alınması istiqamətində görülən işlərə də mənfi təsir göstərir. Bildirib ki, Azərbaycan vətəndaşı ilə nikaha daxil olan əcnəbi ölkədə əmək fəaliyyəti ilə məşğul ola bilir və bu da düzgün deyil.

Mənbə: AZƏRTAC