NDU-nun İngilis dili Təmayüllü Gimnaziyasına qəbul imtahanı keçirilib

Bu gün Naxçıvan Dövlət Universitetinin (NDU) İngilis dili Təmayüllü Gimnaziyasına qəbul imtahanı keçirilib.

Ali təhsil ocağının media və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, universitetin Xarici dillər fakültəsində muxtar respublikanın ümumtəhsil məktəblərinin 5-ci sinfini bitirən şagirdlər üçün keçirilən qəbul imtahanında ümumilikdə 233 şagird iştirak edib.

İmtahanda Azərbaycan dili, Riyaziyyat, İngilis dili, Tarix və Təbiət fənlərindən ümumilikdə test formatında 100 sual təqdim olunub. 3 saat davam edən imtahanın sualları Naxçıvan Dövlət Universitetinin İmtahan Mərkəzi tərəfindən tərtib edilib. İmtahanlarda şagirdlərin təhlükəsizliyinin və sağlamlığının təmin edilməsi üçün Naxçıvan Muxtar Respublikası Daxili İşlər və Səhiyyə Nazirliklərinin əməkdaşları prosesə cəlb olunublar. 28 nəzarətçinin iştirak etdiyi imtahan 14 sinifdə aparılıb.

Qeyd edək ki, İngilis dili Təmayüllü Gimnaziyaya müsabiqə yolu ilə aparılan qəbul imtahanının nəticələri 2 gün ərzində Naxçıvan Dövlət Universitetin rəsmi internet saytında (www.ndu.edu.az) yerləşdiriləcək. 2024-2025-ci tədris ilində muxtar respublika üzrə 60 şagirdin təhsil alacağı gimnaziyada tədris Azərbaycan dilində həyata keçiriləcək.

Mənbə: AZƏRTAC